ភ្នំពេញ៖ នាយករដ្ឋមន្ត្រីកម្ពុជា សម្តេចមហាបវរធិបតី ហ៊ុន ម៉ាណែត បានលើកទឹកចិត្តដល់គ្រឹះស្ថានធនាគារ និងហិរញ្ញវត្ថុ រៀបចំឥណទានឡើងវិញដល់ប្រតិបត្តិករក្នុងវិស័យទេសចរណ៍ ជាពិសេសវិស័យទេសចរណ៍នៅខេត្តសៀមរាបដែលជួបប្រទះនូវបញ្ហាផ្នែកហិរញ្ញវត្ថុ។

ថ្លែងនៅក្នុងពិធីសម្ពោធ «អគារស្នាក់ការកណ្តាល វីងថៅវើ (Wing Tower)» នាព្រឹកថ្ងៃទី២០ ខែធ្នូ ឆ្នាំ២០២៣ សម្តេចធិបតីបានលើកឡើងដូច្នេះថា៖ «លើកទឹកចិត្តឱ្យគ្រឹះស្ថានធនាគារ និងហិរញ្ញវត្ថុ រៀបចំឥណទានឡើងវិញ ដើម្បីជួយវិស័យទេសចរណ៍ ជាពិសេសវិស័យទេសចរណ៍នៅខេត្តសៀមរាប អតិថិជនដែលជួបប្រទះការលំបាកផ្នែកហិរញ្ញវត្ថុបណ្តោះអាសន្ន ដោយមិនចាំបាច់ធ្វើសមវិធានធន់រយៈពេល ១២ខែ»។

សម្តេចធិបតី បានគូសបញ្ជាក់ថា រាជរដ្ឋាភិបាលបានរៀបចំកម្មវិធីផ្តល់កម្ចីដោយផ្ទាល់ដល់ប្រតិបត្តិករនៅខេត្តសៀមរាប ជាមួយនឹងអត្រាការប្រាក់សមរម្យតាមប្រភេទអាជីវកម្ម និងការអនុគ្រោះផ្សេងទៀត ដើម្បីជួយស្តារវិស័យទេសចរណ៍នៅខេត្តសៀមរាប។

ជាមួយគ្នានេះ សម្តេចធិបតី ក៏បានជំរុញទៅដល់ធនាគារទាំងអស់ផ្ដល់ឥណទានទៅដល់សហគ្រាសមីក្រូធនតូច និងមធ្យម និងបង្កើនឥណទានទៅដល់វិស័យកសិកម្មផងដែរ។

តែយ៉ាងណា សម្តេចធិបតី បានណែនាំឱ្យគ្រឹះស្ថានធនាគារ និងហិរញ្ញវត្ថុ មុននឹងផ្តល់ឥណទាន គឺត្រូវពិនិត្យ និងវាយតម្លៃឱ្យបានច្បាស់លាស់ ធ្វើយ៉ាងណាឱ្យប្រព័ន្ធធនាគារមានលំនឹង៕